Siân Eirian fydd cadeirydd newydd Cyngor yr Eisteddfod Genedlaethol

Siân Eirian, cyn-gyfarwyddwr Eisteddfod yr Urdd, fydd cadeirydd newydd Cyngor yr Eisteddfod Genedlaethol.

Bydd yn olynu Gethin Thomas yn y rôl, gyda'r cyn-Aelod Seneddol Elfyn Llwyd wedi'i gadarnhau'n is-gadeirydd.

Bydd y ddau yn dechrau eu swyddi ym mis Ionawr, am gyfnod o dair blynedd.

Daw Siân Eirian o Langernyw, Conwy, ac mae wedi gweithio gyda'r Urdd ers amser hir fel aelod Aelwyd Bro Cernyw ac fel Cyfarwyddwr Eisteddfod yr Urdd a'r Celfyddydau.

Roedd hefyd yn gyfrifol am greu gwasanaeth Cyw a Stwnsh yn ystod ei chyfnod fel Pennaeth Rhaglenni Plant a Phobl Ifanc S4C.

Ym mis Awst fe gyhoeddodd yr Eisteddfod Genedlaethol bod Nic Parry wedi cael ei ethol yn Llywydd y Llys a chadeirydd Bwrdd Rheoli'r sefydliad.

Yng nghyfarfod olaf Gethin Thomas fel cadeirydd y cyngor, diolchwyd iddo am ei ymroddiad a'i gyfraniad dros y blynyddoedd.

Yn ogystal â bod yn gadeirydd, bu'n is-lywydd Llys yr Eisteddfod.

Yn y cyfarfod diweddaraf fe gyhoeddodd Nic Parry y bydd Gethin Thomas yn cael ei anrhydeddu'n Gymrawd yn ystod Eisteddfod y Garreg Las y flwyddyn nesaf, yn dilyn marwolaeth D Hugh Thomas yn gynharach eleni.

Gyda dim ond pum Cymrawd, dyma'r anrhydedd uchaf sy'n cael ei roi am oes o wasanaeth i'r Brifwyl.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.