"Hidhaan kun rakkoo guddaadha, waan ta'e gochuu qabna - Tiraamp

Haguuggii Tamsaasa Kallattii

1. 23 Amajjii 2026Kibba Gondaritti hidhattoonni Faannoo heddu harka kennachuu Rayyaan Ittisaa ibse

   

   Madda suuraa, FDRE Defense Force

   Hidhattoonni Faannoo naannoo Amaaraa, Kibba Gondar keessa socho'aa turan heddu harka kennachuusaanii Raayyaan Ittisaa Itoophiyaa beesksise.

   Hidhattoonni Faannoo Kibba Gondar Aanaa Gaayint keessa sochaa turan hidhannoosaanii waliin karaa nagaan raayyaa ittisaatti harka kennatan jechuun fuula miidiyaa hawaasaa isaa gubbaatti ibse.

   Hidhattoonni kunneen karaa nagaan akka galaniif waamicha godhameef fudhachuun meeshaa waraanaa hidhatan guutuu waliin raayyaa ittisaa naannicha jirutti harka akka kennatuudha kan ibsame.

   Hidhattoonni waamicha godhameef fudhatanii karaa nagaa galan ajajaa kutaa waraanaa 10ffaa kan ta'an Leetinaant Koloneel Asaggaa Akaalaafi qondaalonni mootummaafi abbootiin amantaa bahanii simachuus ibse Raayyan Ittisaa Itoophiyaa fuula miidiyaa hawaasaa isaa gubbaatti.

2. 22 Amajjii 2026Chaayinaan shakkii cimaa 'Boordii Nagaa' Tiraamp irratti qabdu ibsaa jirti

   

   Madda suuraa, Reuters

   Chaayinaan miseensa Boordii Nagaa Tiraamp akka taatuuf hafeeramtus keessatti hirmaachuudhaaf fedhii qabaachuu ibsuu dhabuusheetiin alatti dhaabbatacharraatti shakkii cimaa akka qabdu beeksifteetti.

   Dubbi-himaan ministeera dhimma alaa Chaayinaa, "haalli addunyaa hanga fedhe jijjiiramuyyu , Chaayinaan sirna idil-addunyaa dhaabbata Biyyoota Gamtoomanii (UN) giddu-galeessa godhate deeggarti," jechuun ejjennoo Beejing gaazexeessitootatti hime.

   Sabaa-himaaleen mootummaa Chaayinaa Boordii Naga Tiraamp irratti qeeqa cimaa dhiyeessaa kan jiran yoo ta'u, koreen kun "haqaan nagaaf kan hojjetudhaa?" gaaffii jedhu kaasaa jiru.

   Dabalataan Boordichi "kilaba dhuunfaa ykn boordii daarektarootaa dolaara biliyoonaa baasisu" uumaa jira kan jedhunis yaaddoon cimeera.

   Yaaddoon guddaa gama Chaayinaan jiru dhaabbata Biyyoota Gamtoomanii bakka buusuuf fedhii qaba kan jedhudha.

   Doonaald Tiraamp Boordiin Nagaa kun dhaabbata Biyyoota Gamtoomanii kan bakka bu'u ta'aa jedhamee gaafatamee "ta'uu danda'a" deebii jedhu kenneera.

3. 22 Amajjii 2026Maqaleetti Kirkirri lafaa muudate

   

   Madda suuraa, Getty Images

   Kirkirri lafaa reektaal iskeelii 4.3 ta'u naannawwa Magaalaa Maqaleetti uumame jedhe Dhaabbanni Qorannoo Sosochii Kirkira Lafaa Ameerikaa.

   Sochiin lafaa kun ganama har'aa Maqalee irraa gara kaaba bahaatti fageenya kiiloo meetira 56 irratti umame.

   Sochii Kirkira Lafaa kanaan hanga ammaatti, miidhaan lubbuu namaafi qabeenya irra gahee akka hin jirre eerameera.

   Itoophiyaatti sochiin lafaa irra deddeebiin mudataa jira.

   Baatii darbe keessas Maqalee dabalatee magaalota Tigraayifi Affaar keessatti, sochiin lafaa muudachuun ni yaadatama.

4. 22 Amajjii 2026Zalansikiin waraanni Yukireen xumuramuuf dhiyaatera jedhan

   

   Madda suuraa, EPA

   Walgahii har'a pirezidaantii Ameerikaa Doonaald Tiraamp waliin taasifame eeruun Zelenskiin sanadoonni waraana kana xumuruuf kaayyeffatan ''qophaa'uutti dhihaataniiru'' jedhan

   Pireezidaantiin Ameerikaa Doonaald Tiraamp Pirezidaantii Yukireen, Volodymiir Zelenskii waliin Daavoositti wal arguun akkataa waraanicha yeroo xumuraaf goolabuun danda'amurrtti mari'chuun ibsameera.

   Zalaniskiin Yukireen ''amanamummaa fi kutannoodhaan'' hojjechaa akka jirtu ibsuun, Raashiyaan ''weerara kana xumuruuf'' qophii ta'uu qabdi jedhe

   Ameerikaan Yukireen waliin dhaabbachuu akka itti fuftu abdii akka qabaachuu eeruun Awurooppaanis dhimma kana irratti cimina akka qabaatan waamicha dhiyeessan.

   Zelenskiin Awurooppaa fi Ameerikaan qqamolee gurgurtaa misaa’elaa Raashiyaaf taasifamu dhaabuu dadhabuu isaaniif qeeqaniiru

   Traamp kanaan dura waliigalteen nagaa biyyoota gidduutti taasifamu ammallee hojii irra jira jedhanii dubbatanis waraanni Raashiyaa fi Yukireen gidduu jiru hin dhaabbanne.

   Tiraamp dhimma kanatti xumura gochuun barbaachisaa ta’uus irra deddeebin ibsa gaazexeessitootaaf kennaniin beeksisaniiru

   Ergamaan addaa isaa Isteev Wiitkoof wanti irratti walii utuu hin galamin hafe tokko qofa akka ta’e kan dubbatan yoo ta’u, innis gaaffii Moskoon lafa ishee Yukireenin qabame akka gadi dhiistu dhiheessite ta’uu danda'aa jedhan.

   Kana boodas gorsaan Tiraamp Wiitkoof fi Soddaaan Tiraamp Jaareed Kushner Pirezidaantii Puutiin waliin Moskootti ni mari'atu jedhamee egama.

5. 22 Amajjii 2026Raashiyaan doolaara bil. tokkoon Filisxeem deeggaruuf qophii ta'uu Putiin ibsan

   

   Madda suuraa, AFP

   Mootummaan Raashiyaa mana maree nagaa Tiraamp hundeessaa jirutti makamuun duulaa Gaazaa deebisanii ijaaruuf doolaara biiliyoona tokko kaffaluuf qophii ta’uun ibsame.

   Akka Dhaabbanni oduu Raashiyaa TASS jedhamu ibseetti Puutiin Qabeenya Raashiyaa Ameerikaa dhorkametti fayyadamuun ummata Filisxeem akka deeggaruu barbaadan ibsaniiru.

   Tiraamp biyyootni Mana Maree Nageenyaa kanatti makamuu barbaadan doolaara biiliyoona 1 gumaachuu akka qaban gaafataa turaniiru.

   Putiin Mootummaan Falasxiin walaba ta’e Baha Giddu Galeessaa keessatti karaa nagaa akka hundeeffamuu fi qubsuma argachuu danda’u qofa akka tumsa Puutiin cimsanii dubbataniiru

   Chaayinaan gama isheen "Mana Maree Nageenyaa" Pirezidaantiin Ameerikaa Doonaald Tiraampiin eegaletti akka makamuuf waamichi taasifamufi ibsite.

   Garuu hanga ammaatti hirmaachuuf fedhii akka qabdu hin ibsine, dhimma kana irratti shakkii guddaa akka qabdu fi qorattu ibsiteetti.

6. 22 Amajjii 2026Daa'imman faalama omisha albuudaa Itoophiyaan miidhaman haqa darbaadu-HRW

   

   Madda suuraa, FMC

   Dhaabbanni mirga namaaf falmu Hiyuumaa Raayitis Wooch, UN'tti Koreen Kabaja Mirga daa’immanii Itoophiyaan akka omisha warqee Laga Dambii dhaabdu dhiibbaa akka taasisu gaafate.

   HRW hojii omisha warqee Laga Dambii Oromiyaa Gujiitti faalama fidaa jiruu fayyaa daa’imman irratti miidhaa geessaa jiru furmaata hin argannee jedhe.

   Dhaabbatichi, hawaasni naannawa sanaa yeroo dheeraadhaaf rakkoo fayyaa garagaraa himataa turani jedhe.

   Daa’imman qaama hirruun dhalachuu, ulfi dubartootarraa bahuufi kaanneen biroollee rakkoo hawaasni itti dararamaa jiru ta'uu ibse.

   Qorannoon hedduun akka taasifamettis keemikaalonni summaa'oon akka Kaadmiyeemii, Liidii fi kaan kan bakka omisha warqee kanaatti argamuun eeramaa ture jedhe ibsi HRW

   Mootummaan sababa mormii mudatee tureen warshaa sana bara 2018 haga 2021 cufeeti ture.

   HRW garuu angawootni bakka omisha warqee kana dhoksaan banamu taasisan jedheera.

   Walii galteen mootummaa fi dhaabbata MIDROC kan bakka omisha warqee kana gaggeessaa jirus iccitiin akka qabamu taasifamu eerera.

   MIDROC rakkoo kana dura tureef tarkaanfiin sirreeffamaa utuu hin fudhatamin hojiitti deebi’uu isaallee HRW ibseera.

   Kanaaf Itoophiyaan akkaataa waliigaltee idila addunyaan seera mirga daa’immanii kabajuu mallateesite kabajuu akka qabdu UN gama isaan dhiibba akka taasisu dhabbatichi gaafateera.

   Kan malees miidhaa gaheef qorannoon akka taasifamu, namoota faalama kanaan miidhamaniif beenyaan akka kaffalamu dhiibban taasifamuu qaba jedhe.

   Odeeffannoo dabalataa :

   Warshaa warqee MIDROC Lagadambii: lafa warqeen 'summii' itti taate

7. 22 Amajjii 2026'Boordiin Nagaa' Tiraamp rakkoolee nageenyaa addunyaa fura jechuun hundeesse maalidha?

   

   Madda suuraa, AFP via Getty Images

   Pirezidaantiin US Doonaald Tiraamp inishiteevii 'Boordii Nagaa' irratti akka hirmaataniif gaggeessitoota biyyoota hedduuf waamicha godheera.

   Kaayyoon Boordii Nagaa Tiraamp kun addunyaarratti waraana biyyoota garaa garaa keessatti gaggeeffamu furuu akka ta'etu ibsame.

   Dippilomaatonni garuu hojii Dhaabbata Biyyoota Gamtoomanii (UN) irratti dhiibbaa uuma jechuun karoora Tiraamp kana ija shakkiin ilaaluu akka eegalan gabaasni Rooyitars ibsa.

   Sababni waraanafi rakkoo nageenyaa addunyaarra jiru furuuf fala dhahuun aangoo Dhaabbata Biyyoota Gamtoomaniiti waan ta'eef.

   Biyyoonni michuu US ta'an affeerraa Tiraamp kana ija shakkiin ilaalatuma yoo fudhatan, muraasni didaniiru.

   Biyyoota US waliin hariiroo gaarii hin qabne muraasnis kan akka Beelaaruus fa'aa ammoo Boordii Nagaa bulchiinsi Tiraamp ifa godhe kanatti makamuuf tole jedhaniiru.

   Ofii Boordiin Nagaa Tiraamp maalidha? Boordichatti makamuuf biyyoota kamtu waamicha Tiraamp fudhate?

8. 22 Amajjii 2026Lammiin Itoophiyaa Ingilizitti miidhaa saalaa raawwachuu haale

   

   Madda suuraa, Google

   Ingiliz magaalaa Saawuzhampitan keessatti baqataan lammii Itoophiyaa ta'e hoteela baqattoonni keessa tursiifaman keessatti miidhaa saalaa raawwateera jedhamuun himatamus inni garuu haaleera.

   Dargaggeessi lammii Itoophiyaa umrii waggaa 23 Malaakuu Gabrasanbat jedhamu kun Ertiraatti dhalate. Erga to'annoo seeraa jala oolee booda Roobii mana murtii Saawuzhampitanitti dhihaatee ture.

   Shakkamaan kun gaaffiin mirga wabiif dhiheessee ture fudhatama hin arganne.

   Namni kun baqattummaan waggoota shan UK keessa ture, waggoota kunneen keessatti dhimmi baqattummaa isaa akka ilaalamuuf gaafachaa ture.

   Namni kun dubartii tokkotti dhihaatee tuqeera jedhamuun to'atame. Miidhaa saalaa raawwachuunis himatame, inni garuu kana hin raawwanne jechuun haale.

   Poolisiin Hampishir torbee darbe guyyaa Jimaataa taatee hoteela Hayifild Haawus jedhamutti mudate qorataa jiraachuu ibseera.

   Abukaatoon shakkamaa kanaa Kaaliid Mizuurii ''Ertiraatti dhalate. Biyyoota koolugaltummaa gaafachuun maluuuf irraati kan dhufe. Ertiraatti dhiittaan mirga namoomaa bal'inaan raawwatama. Sababa hin beekamneen waggoota shan eeguuf dirqameera. Hanga yoonaa murtee hin arganne,'' jedhe.

   Hoteelli kun yeroo dhihoo as bakka miidhaan saalaa itti heddummaatu ta'eera, sababa kanattis giddugala mormii fi hookkara godaantotaa ta'eera.

   Hiriirri mormii dhaadannoo Stand up to Racism jedhuun gaggeeffamu ammoo mirgi godaantotaa akka kabajamu kan gaafatudha.

   Ji'oota duras baqataan lammii Itoophiyaa Haddush Qibaatuu jedhamu miidhaa saalaan yakkamaa ta'ee erga hidhaan itti murtaa'ee booda UK keessaa gara Itoophiyaatti ari'amee ture.

9. 22 Amajjii 2026Israa'eel haleellaa Gaazaatti gaggeessiteen gaazexeessitoonni sadii ajjeefaman

   

   Madda suuraa, EPA

   Israa'el haleellaa giddu-galeessa Gaazaatti gaggeessiteen gaazexeessitoonni Filisxeem sadii ajjeefamuu hojjattoonni lubbuu baraaran ibsan.

   Ejansiin Ittisa Sivilii Gaazaa Hamaasiin hogganamu akka ibsetti gaazexeessitoonni ajjeeffaman konkolaataan osoo deemanuu haleellaa irratti raawwatameen yoo ta'u, dhaabbata gargaarsaa Masirii tokkoof hojjatu.

   Humni Waraanaa Israa'el ammoo namoota diroonii Hamaasiin wal-qabatu balaliisaa turan haleeluu ibsuun, haleellaan kan gaggeeffame loltoota Israa'el irratti yaaddoo waan uumaniif ta'uu beeksise.

   Gama biraan ammoo haleellaa artilarii waraanni Israa'el Gaazaa bakka garaa garaatti raawwataniin kaleessa, Roobii, namoonni biroo saddeet ajjeefamuu Ministeerri Fayyaa Gaazaa beeksise.

   Namoota saddeet ajjeefaman keessaa lama ijoolledha.

   Ji'a Onkoloolessaa darbe erga Israa'elifi Hamaas gidduutti waliigalteen dhukaasa dhaabuu mallatteeffamee as, namoonni 466 haleellaa Israa'el Gaazaatti raawwattuun ajjeefamaniiru.

10. 22 Amajjii 2026Itoophiyaan 'loogiifi doorsisa' Tiraamp dura akkamiin dhaabbachuu qabdi?

    

    Madda suuraa, b

    Sa'aatii 2 dura

    Pirezidantiin Ameerikaa Donaald Tiraamp irra deddeebiin dhimma hidha Abbayyaafi Itoophiyaa dubbachaa jiru.

    Dubbiin isaanii kuni erga Itoophiyaafi Masrii nan araarsa jedhanii xalayaa Masriitti ergan booda itti fufeera.

    Tiraamp wantoota bara bulchiinsa isaanii waggaa jalqabaatti dalage jedhan keessaas, Fooramii Dinagdee Addunyaa cinatti pirezidantii Masrii waliin yeroo mari'anis dhimma kana dubbatan.

    Masriifi Sudaan waamicha marii Tiraamp akka fudhatan ibsaniiru. Itoophiyaan dubbii Tiraamp irratti ifatti wanti dubbatte hin jiru.

    Maaliif callifte? Itoophiyaan maal gochuu qabdi? Waamicha Tiraamp dhaquu qabdii? Tiraamp jaarsa araaraa ta'uu danda'uu?

    Kanaafi dhimmoota kaan irratti ekispartii Ioophiyaa dhimmoota laggeen daangaa ce'anirratti muuxannoo qaban dubbisneerra.

    Obbo Faqq [Faqqaa] Ahimad Nagaash marii Hidha Abbayyaafi laga Abbayyaa keessatti Itoophiyaa bakka bu'uun hirmaataa turan.

    Yeroo ammaa misooma bishaanii, bishaan daangaa ce'aniifi dippilomasii hayidiroorratti dhuunfaan gorsa kennu.

    Guutummaa isaatiif asiin dhiyaadhaa!

11. 22 Amajjii 2026"Hidhaan kun rakkoo guddaadha, waan ta'e gochuu qabna" - Tiraamp

    

    Madda suuraa, Reuters

    "Hidhaan [Laga Abbayyaa Itoophiyaa] rakkoo guddaadha," kan jedhe Pirezidant Tiraamp dhimma kanarratti Itoophiyaafi Masirii gidduutti mariin jiraachuu akka danda'u eereera.

    Tiraamp Fooramii Dinagdee Addunyaa Daavos keessatti gaggeeffamerratti Pirezidantii Masirii Abdell Fattaah Al- Siisii waliin marii kora kana maddiitti taasisaniin dhimma Laga Abbayyaarratti Itoophiyaa fi Masiriin waliigalteerra gahuu danda'u jedhee akka amanu dubbateera.

    Hidhaan Laga Abbayyaa "bishaan Naayil akka hin yaane" godha kan jedhe Tiraamp, biyyoota lamaan gara mariitti fiduu akka barbaadu dubbachuusaa maddi oduu Anaaduuluu gabaaseera.

    "Haala rakkisaadha. Hidhaa kana kan ijaaran karaa bishaan waggoota miliyoonaaf yaa'urrattidha. Amma bishaan kun sababa hidhaa guddaa tokkootiin hidhameera ," jechuun turtii Pirezidant Al- Siisii waliin turti itaasiseen dubbateera Pirezidant Tirmap.

    "Hidhaa kana ilaalchisee waan ta'e gochuun nurra jiraata jedheen yaada. Hidhaan kun rakkoo guddaadha. Waan ta'e ni goona," jedhe Tiraamp itti dabaluun.

    Tiraamp torban darbe Finfinnee fi Kaayiroo gidduutti marii jalqabsiisuuf yaada akka qabu dubbachuun isaa ni yaadataa.

    "Ati pirezidantii cimaadha," jechuun Al -Siisii kan dinqisiifate Tiraamp hariiroo Masirii waliin qaban jabeeffachuuf akka hojjetanis yeroo marii taasisan kanatti ibsuu isaa Fox News gabaaseera.

    "Itoophiyaanis gaggeessaa cimaa qabdi. Dhugaadha akka kee kanatti hin beeku garuu nama cimaadha. Lamaan keessan walitti dhiyeessinee waliigalteerra gahuuf yaalla."

    Pirezidantiin Ameerikaa Doonaald Tiraamp torban darbe xalayaa Pirezidantii Masirii Abdel Fattaah Al _Siisiif ergeen "miira michummaa dhuunfaa waliin qabnuufi nageenyaafi tasgabbii ummata Masiriif murannoon qaburraa" dhimma Hidha Haaromsaa ilaallatuun marii jalqabuu akka barbaadu ibsuun isaa ni yaadtama.

    Mootummaan Itoophiyaa xalayaa kanas ta'e yaada Tiraamp Daavositti kenne ilaalchisee hanga ammaatti waanti jedhe hin jiru.

    Odeeffannoo biroo dhimma kanarratti:

    Itoophiyaan 'loogiifi doorsisa' Tiraamp dura akkamiin dhaabbachuu qabdi?

    Dogongora Tiraamp shanan Abbayyaafi Hidha Abbayyaarratti

12. 22 Amajjii 2026'Boordiin Nagaa' Tiraamp Dolaara Biliyoona 1 kaffaluun miseensa itti ta'anii maalidha?

    

    Madda suuraa, EPA

    Karoorri Boordiin Nagaa Pirezidant Doonaald Tiraamp dhaabbata Biyyoota Gamtoomaniitiin fudhatama kan argate ture. Qaama Karoora Nagaa kanaa kan ta'e 'Qaamni Ce'umsaa Haaraa Idil-addunyaa; ammoo falmisiisaa ta'eera.

    Miseensa hoji-raawwachiiftuu 'Boordii Nagaa ta'uun kan filataman keessaa tokko Ministirri Muummee duraanii Yunaayitid Kingidam Toonii Bileeyer keessatti argama.

    Toonii Bileeyer ammoo weerara bara 2003 Iraaq irratti raawwatame deeggaruun himatama.

    Boordii kana keessa namni Filisxeem ta'e tokkollee hin jiru.

    Miseensa Dhaabbataa Boordii kanaa ta'uuf ammoo Dolaara Biliyoona 1 kaffaluu barbaachisa jedhamuun gaaffee kaaseera.

    Boordicha keessatti gaheen dhaabbati Biyyoota Gamtoomanii (UN) qabaatus falmisiisaa ta'eera.

    Boordiin Nagaa kun eentuuf waamicha taasisee?

13. 22 Amajjii 2026, Ashamaa!

    Tamsaasa kallattii kenya eegalleerra.

    Odeessawwan biyya keessafi idiladdunyaa faana dhoofnee isin biraan geenya.

    Odeeffannoo waktawaa karaa toora marsariitii, facebook, Youtube fi WhatsApp BBC News Afaan Oromoo argachuu dandeessu.

    Nu hordofaa!