ትግራይ፡ ጀነራል ጉዕሽ ገብረ ብወሓስ ከምዝተፈትሐ ተገሊፁ

ማእሰርቱ ከዘራርብ ዝጸንሐ ብ/ጀነራል ጉዕሽ ገብረ ብዋሕስ ክፍታሕ ድሕሪ ምውሳኑ ካብ ማእሰርቲ ተፈቲሑ ከምዘሎ ሰብመዚን ቤተሰብን ሓቢሮም።

ብመሰረት እቲ ብ18 ጥሪ ዝተወሃበ ቆፀሮ ሎሚ ናብ "ወተሃደራዊ ቤት ፍርዲ" ቀሪቡ ብወሓስ ክፍታሕ ዝተወሰነ ኮይኑ ኣማስዩ ካብ ቤት ማእሰርቲ ከምዝወፀ ቢቢሲ ኣረጋጊፁ።

እቲ ኣዛዚ ሓይልታት ትግራይ ዝነበረ ጀነራል፡ ኣብ ፈለማ ናይቲ ዝሓለፈ ወርሒ'ዩ ብሓይልታት ጸጥታ ተታሒዙ ኣብ ቀይዲ ኣትዩ ጸኒሑ።

ብጥሪ 9 ድሕሪ ምቕያዱ፡ ኣብ ውሽጢ 24 ሰዓታት ናብ "ወተሃደራዊ ቤት ፍርዲ" ከምዘቕረብዎን ንጥሪ 18 ናብ መጋባእያ ክቐርብ ከምዝተወሰነን ኣብ ዕላዊ ማሕበራዊ ገፅ ቢሮ ሰላምን ፀጥታን ትግራይ ዕላዊ ከምዝገበርዎን ይዝከር።

ብርጌደር ጀነራል ጉዕሽ፡ "ምስ ፀላኢ ምርኻብ፣ ሰራዊት ናይ ምፍራስ ተልእኾን ናይ ላዕለዋይ መሪሕነት ትእዛዝ ብምጥሓስን" ተጠርጢሩ ከምዝተኸሰሰ እቶም ሰበ መዚ ይገልፁ።

ሰብመዚ ሰላምን ፀጥታን ትግራይ ብርጌደር ጀነራል ጉዕሽ: ብ12 ጥሪ፡ ኣብ ቤት ጽሕፈት ሰሜናዊ ግንባር ንመጀመርታ ጊዜ ምስ ስድርኡ ተራኺቡ ነይሩ።

ብመሰረት ዝተወሃበ ቆፀሮ ብ18 ጥሪ ናብ "ወተሃደራዊ ቤት ፍርዲ" ከም ዝቐረበን ስድርኡ ኣብቲ መጋብኣያ ከም ዝተረኸቡን እውን ንቢቢሲ ኣረጋጊፆም ነይሮም።

ንኻልኣይ ግዜ ናብ "ወታሃደራዊ ቤት ፍርዲ" ከምዝቐረበ ብምግላፅ ንጥሪ 25 ከምዝተቖፀረ ሓላፊ ቤት ጽሕፈት ቢሮ ሰላምን ፀጥታን ትግራይ ተጋዳላይ መብራህቱ ሃይሉ ምስ ቢቢሲ ኣብ ዘካየዶ ቃለ መሕተት ገሊፁ እዩ።

ብመሰረት እቲ ቆፀሮ ሎሚ መዓልቲ ጥሪ 25 ብወሓስ ከምዝተፈተሐ ተገሊፁ ኣሎ።

ቢሮ ሰላምን ፀጠረታን ትግራይ ኣብ ዘውጽኦ መብርሂ፡ "ቅድም ክብል ሕጋዊ መስርሕ ተኸቲሉ ኣብ ቁፅፅር ውዒሉ ዝነበረ ተጋዳላይ ጉዕሽ ገብረ ካብዙይ ንደሓር ዘሎ ከይዲ ኣብ ደገ ኮይኑ ክከታተል ብዋሕስ ተፈቲሑ 'ሎ" ክብል ኣብ ዕላዊ ማሕበራዊ ገፁ ንህዝቢ ኣፍሊጡ።

ብርጌደር ጀነራል ጉዕሽ ገብረ ንዝሓለፉ 16 መዓልታት ኣብ ማእሰርቲ ዝፀነሐሉ ቦታ ኣበይ ምዃኑ ዝምልከቶ ኣካል ብወግዒ ኣይገለፀን።

ሓላፊ ፍትሒ ሓይልታት ፀጥታ ትግራይ ተጋዳላይ ገብረሚካኤል መብራት፡ ኣባላት ሓይልታት ፀጥታ ትግራይ ዝዳነይሉ ብካብኔ ጊዚያዊ ምምሕዳር ትግራይ ደንቢን ንዕኡ መሰረት ገይሮም ዝወፅኡ መምርሒታትን ስለዘለዉ ብሕጊን ስርዓትን ኢና ንምራሕ ክብል ንቢቢሲ ትግርኛ ምግላፁ ይዝከር።

እቲ ኣዛዚ 'ኣርሚ 15' ዝተባህለ ኣሃዱ ሓይልታት ትግራይ ዝነበረ ጀነራል ጉዕሽ ብዛዕባ ዝቐረበሉ ክሲ ዛጊት ዝሃቦ ወግዓዊ መግለጺ'ኳ እንተዘየለ፡ ደገፍቱ ግን ብሰንኪ ፖለቲካዊ መርገጺኡ ኣብ ቀይዲ ከምዝኣተወ'ዮም ዝኸሱ።

ኣብ ሞንጎ ላዕለዎት መራሕቲ ህወሓት ዝተፈጥረ ፍልልይን ምግምማዕን ንላዕለዎት ኣዘዝቲ ሰራዊት ናብቲ ፖለቲካዊ ወጥሪ ከምዝሰሓቦም ይፍለጥ።

ዝበዝሑ ካብቶም ላዕለዎት ኣዘዝቲ ጸግዒ ህወሓት ከምዝወሰዱን ንመሪሕነት ፕረዚደንት ግዝያዊ ፕረዚደንት ትግራይ ዝነበረ ጌታቸው ረዳን ክቃወሙ እንከለዉ፡ ከም ጀነራል ጉዕሽ ዝበሉ ካልኦት ድማ ንመርገጺ ኣዘዝቶም ኣይተቐበሉዎን።