ትግራይ፡ ደብዳባት ድሮን ኣብ ዝተፈላለየ ከባቢታት ይቕፅል ከም ዘሎ ተገሊፁ

ትማሊ ለይቲ ሰዓት 10 (ኣቈፃፅራ ግእዝ) ኣብ ማእከላይ ዞባ ትግራይ ከተማ እንትጮ ክልተ መካይን ብድሮን ከም ዝተወቐዓ ፖሊስ እታ ከተማ ንቢቢሲ ኣረጋጊፁ።

እቲ ቁምብላ ድሮን ኣብ ጋቢና እተን መካይን ከም ዝዓለበን በቲ ደብዳብ ድማ ሓደ መራሒ መኪና ህይወቱ ክስእን እንከሎ፡ ካልእ ተሓጋጋዚ ድማ ቈሲሉ ሆስፒታል ከም ዝኣተወ ኣዛዚ ፖሊስ እታ ከተማ ዋና ኢንስፔክተር ተስፋይ ኣማረ ንቢቢሲ ገሊፁ።

እተን መካይን ኣይሱዙን ኤፍ ኤስ ኣር ዝዓይነተን ኰይነን፡ እታ ሓንቲ ባናና ፅዒና እታ ካልአይቲ ድማ ዘይቲ፡ በርበረ፡ ሳሙናን ካልኦትን ኣቑሑት ንግዲ ፅዒና ምንባራን ሰለስተ ደብዳብ ከም ዝተኻየደን ተገሊፁ ኣሎ።

ብተመሳሳሊ ኣብ ወረዳ ኣሕፈሮምን ገንደበታን ደብዳብ ድሮን ከም ዝተፈፀመ ቢቢሲ ዝረኸቦ ሓበሬታ የረድእ።

በቲ ኣብ ኣሕፈሮምን ገንደበታን ዝተፈፀመ ደብዳብ ድሮን ኣብ ህይወት ሰብ ዝወረደ ሓደጋ ብንፁር ኣይተፈለ���ን።

ኣብቲ ኣብ ገንደብታ ወጋሕታ 11:30 (ኣ.ግ) ዝተፈፀመ ደብዳብ፡ ኣብ ልዕሊ በርበረን ካልኦት ንግዳዊ ሃለኽቲ ኣቑሑትን ፅዒና ዝነበረት መኪና ከም ዝዓለበ ተፈሊጡ ኣሎ።

ብዘይካ'ዚ፡ ሎሚ ከባቢ ፋዱስ ተወሳኺ ናይ ድሮን ደብዳብ ኣብ ቆላ ተምቤን ፍሉይ ስፍራ ዘለመቀመ ኣብ ዝበሃል ከም ዝበፀሐ ኣብቲ ከባቢ ዝርከቡ መሰኻኽር ንቢቢሲ ሓቢሮም።

እቲ ደብዳብ ኣብ ልዕሊ ንግዳዊ ኣቑሑት ዝፀዓና ናይ ግሊ መካይን ምዃኑ እውን ተገሊፁ ኣሎ።

ኣብ ልዕሊ ሰብ ዝወረደ ሓደጋ ከም ዘሎ ዝተገልፀ ኰይኑ፡ ንፁር ሓበሬታ ግና ገና ኣይተረኸበን።

እቲ ደብዳብ ድሮን ድሕሪ እቲ ኣብ ሰሜናዊ ምዕራብ ከባቢታት ፀለምቲ ዝተጀመረ ግጭት ስዒቡ ይፍፀም ምህላዉ ፀብፃባት ይገልፁ።

መንግስቲ ኢትዮጵያ ብዛዕባ እቲ ደብዳብ ድሮን ዝሃቦ ሓበሬታ ዛጊድ የሎን።

ኣብ ዝሓለፈ ቀዳመ ሰንበት ዝጀመረ ወጥሪ ኣብ መንጎ ሰራዊት ኢትዮጵያን ሓይሊታት ትግራይን ናብ ግጭት ከም ዝተሰጋገረ ክግለፅ ቀንዩ እዩ።

ተቐማጢ ፀለምቲ ብዛዕባ ዝቐነየ ግጭት እንታይ ይብል?

ኣብዚ ሰሙን፡ ኣብ ክልል ትግራይ ወረዳ ጸለምቲ ኣብ መንጎ ሰራዊት ኢትዮጵያን ሓይልታት ትግራይን ሓድሽ ግጭት ከም ዝተላዕለ ክግለፅ ቀንዩ እዩ።

ብ18 ጥሪ ብኣቈጻጽራ ግእዝ (28 ጥሪ) ኣብ ከባቢ ማይዳጉሻ ብኸበድቲ ኣፅዋር ዝተሰነየ ውግእ ከም ዝተወልዐ ሓደ ነባሪ ንቢቢሲ ይገልፅ።

እቲ ስሙ ክጥቀስ ዘይመረፀ ተቐማጢ ፀለምቲ ጣብያ ደገብራይ፡ እቲ ወጥሪ ኣብ ዝሓለፈ ቀዳመ-ሰንበት ከም ዝጀመረ እዩ ዝገልፅ።

ካብ ሰኑይ ጀሚሩ ድማ ናይ ምሉእ ውግእ ከም ዝዓረገ ሓቢሩ።

"ብሰኑይ ድሕሪ ሰዓት፡ ኣብ ሰለስተ ከባቢታት - ምጫራ፡ ማይፀብሪ እምባማድረን ደገብራይን ተዅሲ ነይሩ፡" ብምባል፡ ኣብ ደገብራይ ደብዳብ ድሮን ከም ዝተፈፀመ ይገልፅ።

"ሰሉስ'ውን ብመካናይዝድ ዝተሓዘ ደብዳብ ነይሩ፡" ክብል'ውን ይውስኽ።

መጀመርታ ዝኣተወ እግረኛ ሰራዊት ትግራይ ምዃኑን ሰራዊት ምክልኻል ኢትዮጵያ ድማ ብኸቢድ ብረትን ድሮንን ደብዳብ ከም ዘካየደ ገሊፁ።

"ረቡዕ ዳርጋ ምሉእ መዓልቲ ኣብ ሰለስተኡ ኣንፈት ተዅሲ ነይሩ - ኣብ ዲማ፡ ቀልበዲን፡ ከባቢ ምጫራ፡ ተከዘ ቀልቀል። ብሓሙስ'ውን ኣጋግዜ ዝጀመረ ክሻብ ዓርቢ ካብ ደገብራይ ጀሚሩ ክሳብ ጥቓ ጣብያ ፍየልውሃ ውግእ ተኻይዱ፡" ኢሉ።

እቲ ቀዳመ-ሰንበት ዝጀመረ ተራ ተዅሲ፡ ካብ ሰኑይ ኣትሒዙ ናብ ስሩዕ ውግእ ከም ዝተሰጋገረ ይገልፅ።

ኣብ ነበርቲ ዝወረደ ጕድኣት እንተሎ ተሓቲቱ ድማ ክሳዕ ሽዑ ኣብ ታሕታይ ፀለምቲ ኣብ ሰለማዊ ህዝቢ ዝወረደ ጕድኣት ከም ዘይርኣየን እቲ ጕድኣት ኣብ ሰራዊት ምንባሩን ሓቢሩ።

"ኣብ ላዕላይ ፀለምቲ ብፍላይ ኣብ ደገብራይን ከባቢኡን ግን ክሻብ ሕዚ ደብዳብ ይካየድ ኣሎ፡" ኢሉ።

ነባሪ ናይቲ ከባቢ ብሰኑይ ተዳሂሉ ሃዲሙ ከም ዝነበረን ድሒሩ እኳ እንተ ተመልሰን፡ ደብዳብ ምስ ጀመረ ግና መረበቱ ክሓድግ ከም ዝተገደደ ገሊፁ።

ቢቢሲ ብዛዕባ ኣብ ከባቢ ፀለምቲ ደብዳባት ድሮ ዝተኻይዱ ዝተባህለ ብሳልሳይ ኣካል ከረጋግፆ ኣይከኣለን።

ኣብ ዞባ ደቡብ ትግራይ'ውን "ወጥሪ" ከም ዝነበረ ፀብፃባት ይሕብሩ፣ ሰራዊት ኢትዮጵያ ኣብ ከተማ ኣላማጣ ካብ ዝነበረ መዓስከራቱ ከም ዘንሰሓበ'ውን ተፈሊጡ።

መንግስቲ ኮነ ግዝያዊ መንግስቲ ትግራይ ብዛዕባ'ዚ ዳግማይ ናብ ምሉእ ኲናት ከይዓርግ ስግኣት ፈጢሩ ዝርከብ ግጭት መግለፂ ኣይሃቡን።

ኣብ ትግራይ፡ ተገልገልቲ ኣብ መዓልቲ ልዕሊ 2,000 ብር ከየውፅኡ ተደሪቶም፣ ከምኡ'ውን መንገዲ ኣየር ኢትዮጵያ ናብ ትግራይ ዝገብሮ በረራታት ንሳልሳይ መዓልቱ ደው ኣቢሉዎ ኣሎ።

ሕብረት ኣፍሪቃ፡ ኣብ ክልል ትግራይ ዝለዓለ ነብሰ-ምግታእ ክግበር ጸዊዑ

ኣቦ መንበር ኮምሽን ሕብረት ኣፍሪቃ መሕሙድ ዓሊ ዩሱፍ፡ ኣብ ገለ ክፋላት ክልል ትግራይ ዝግንፍል ዘሎ ኵነታት ብቐረባ ይከታተሎ ከም ዘሎን ኣብ ቀረባ እዋን ብዘጋጠመ ምዕባለታት ዓሚቝ ስክፍታ ከም ዝተሰምዖን ገሊፁ።

"ኵሎም ወገናት ልዑል ነብሰ-ምግታእ ክገብሩ፡ ሓድሕድ ምትእምማኖም ከላሕልሑ ካብ ዝኽእሉ ተግባራት ክሕየቡ፣ ከምኡ'ውን ኵሎም እቶም ገና ዘይተፈፀሙ [ኣብ ውዕል ፕሪቶርያ ዝነበሩ] ጉዳያት ብሃናፂ ዘተ ክፍትሑ፡" ከም ዘለዎም ብምግላፅ፡ ንግዴታታትን መንፈስን ውዕል ፕሪቶርያ ምሉእ ብምሉእ ክኽተሉ ፀዊዑ።

"ሕብረት ኣፍሪቃ፡ ውዕል ፕሪቶርያ ብምልኣትን ኣድማዕን መንገዲ ንምትግባር ዘለዎ ፅኑዕ ተወፋይነት ደጊሙ የረጋግፅን ኣብ ምውሓስ ሰላምን ዕርቅን ንዅሎም ወገናት ዝህቦ ደገፍ፡" ከም ዝቕፅልን ገሊፁ።