Trump threaten to sue Trevor Noah on top Epstein joke for Grammys

US President Donald Trump don threaten to sue comedian Trevor Noah afta e joke about Trump and Jeffrey Epstein for di Grammy Awards.

As e dey host di event, Noah tok say: "Song of di Year – dat na Grammy wey evri artist want almost as much as Trump want Greenland, wey make sense becos Epstein Island don go, e need new one to take hang out wit Bill Clinton."

Pipo know say Trump na associate of Epstein for years, but e tok say im no get knowledge of im crimes, plus dem fall out around 2004. No suggestions dey say e ever visit Epstein private island and e no dey accused of any crime by Epstein victims.

Di US justice department don say allegations about am no get evidence and dem no be true.

For 2020, one tok-tok pesin for Clinton, say di former president no ever" go Epstein Island, Little St James. Clinton no dey accused of any wrongdoing.

Trump don respond to Noah joke as e say "I dey send my lawyers to sue".

Posting on Truth Social, Trump write: "Noah tok, INCORRECTLY about me, e say Donald Trump and Bill Clinton spend time on Epstein Island. WRONG!!!

"I no fit speak for Bill, but I no ever go Epstein Island, nor anywhere close, and until tonight false and defamatory statement, nobody don ever accuse me of being there, not even by di Fake News Media.

"Noah, a total loser, beta get im facts straight, and get dem straight fast."

E add: "Get ready Noah, I go have some fun wit you!"

Dem find Epstein dead for im New York prison cell for 2019 as e dey await trial on sex trafficking charges, more dan a decade afta e dey guilty of soliciting prostitution from a minor.

E bin buy im private island for 1998. Multiple survivors don allege say dem dey traffic dem go there and abuse dem.

Trump don engage for legal action wit multiple media organisations in recent years, wey include di New York Times and di Wall Street Journal.

For December, e file one multi-billion-dollar lawsuit for one Florida court wey e accuse di BBC of defamation plus say dem violate trade practices law on top di editing of one Panorama programme.

Noah na South African-born comedian wey dey host di The Daily Show on Comedy Central for US for seven years.