Nigerians mourn death of fast-rising singer Nanyah wey snakebite kpai

Nigerians on social media dey mourn di death of fast-rising singer Ifunanya Nwagene wey pipo sabi as Nanyah.

Tori be say snake bin bite di 26-year-old lady for her house and she bin make effort to save her life by rushing hersef to two different hospitals for urgent medical attention.

Social media users bin claim say di hospitals turn di young lady away becos dem no get anti-venom for dia facilities.

Di incident bin happun for di early hours of Saturday 31 January for Nanyah house for Abuja, Nigeria capital.

One video wey don go viral on social media show as one man hold di cobra snake wey still dey alive as voices for background dey express shock ova di reptile.

Nanyah na classical, jazz, RnB, and soul singer wey pipo dey always commend di sweetness of her voice.

One close friend, Sam Ezugwu, di co-founder and music director of di Amemuso Choir wia she bin sing, tell di BBC say Nanyah na "rising star".

E say Nanyah bin dey plan to stage her first solo concert later dis year.

Hillary Obinna, wey be anoda friend wey bin sing wit her, tell di BBC say dem tell am say Nanyah bin dey sleep wen "di snake bite bin wake her up".

E say dem later find two snakes for di house.

Ezugwu say she bin first seek treatment for one nearby clinic but dem no get any antivenom so she bin go one hospital.

E say e bin rush to di hospital on Saturday afta e hear say dem don take her dia. E say di hospital get one of di required antivenoms but dem no get di oda.

"While dem bin dey try to stabilise her, she no fit speak but she fit make hand gestures. She bin dey struggle to breathe," e add.

Ezugwu say e bin drive out to search for di missing antivenom but return to find out say she don die.

E say di entire choir bin go to di hospital dat evening, "hoping say miracle go happun".

Obinna describe Nwangene as "a veri wonderful girl, she dey humble – veri intelligent and veri talented".

"Evribodi dey shattered. We no fit sleep for night."

While Nigerians dey mourn Nanyah on social media, many pipo dey para why di facilities she bin drive hersef to get medical help no get anti-venom.

E don bring up di mata of inefficiency of some Nigerian hospitals wey suppose be places wia pipo go get medical help, but turn out to dey unable to render di needed help.

Nigerian medical doctor and content creator Chinonso Egemba wey pipo sabi as Aproko Doctor, describe Nanyah death as sad and call on Nigerians to demand di basics from dia leaders.

"Snake dey bite pipo evriwia, weda you dey for bush or for city, India or Australia or oda kontris make you name dem. Snake dey bite pipo evriwia but dem no dey die like dis. Dem no dey die just becos dem go two hospitals, two, no be one, two, separate hospitals and dem look dem straight in di eye and tell dem say we no get anti-venom for kontri wia snakes dey live in 2026. No be 1980, no be 1970, 2026.

"And e don happun to pesin wey dey popular, but tink about di oda pipo wey e bin don happun to wey bin no get anybodi to report to. Pipo wey no get anywia to go and dem just lose dia lives like dat. Bright futures cut short.

"And wen you tink about am, if you even come to research, Nigeria get a particular anti-venom wey dem develop for Nigerian snakes, dem dey call am Echitab," Aproko Doctor tok for one video on social media.

Di medical practitioner ask why dis anti-venom no dey for di fridge of dis hospitals wey Nanyah bin go.

"Na simply becos we don forget di basics. Our politicians dey build flyovers wia ambulances no dey exist. We dey focus on how to build ultra modern hospitals wen di Primary Healthcare Centre wey be di first point of call for any kontri wey dey function suppose dey, but instead of us to focus on dose ones, dem go wan do big project wey dem go cut ribbon and evribodi go clap for dem instead, simply becos dem dey try to focus on di next election instead of di lives of di pipo wey dem actually suppose to save.

"For evri Primary Health Care Centre, di basic small hospital wey dey beside you suppose get anti-venom for kontri wia snakes dey live. Dem suppose get oxygen and dem suppose get pipo wey sabi wetin dem dey do," e add.

Federal Medical Centre, Jabi, react to di incident

Federal Medical Centre, Jabi, Abuja, don react to di death of singer Nanyah wey die for dia facility.

For statement on Sunday, 1 January, di hospital deny allegation say dem no give di deceased antivenom as plenti pipo bin dey tok.

"Wen Ms Nwagene arrive, our medical staff provide immediate and appropriate treatment, including resuscitation efforts, intravenous fluids, intranasal oxygen and administer polyvalent snake antivenom".

Di statement add say afta thorough investigation, e kon dey clear to dem say Ms Nwangene suffer severe neurotoxic complications from di snakebite, say onto all di efforts dem put to stabilise her and transfer her to Intensive Care Unit for further treatment, she bin experience sudden deterioration just bifor di transfer.

"Our team of professionals work diligently to do CPR and oda life-saving measures; however, despite all di efforts, we no dey able to revive her".

Di hospital say dem stand by di quality of care and dedication dia team bin give di deceased bifor she pass on. Dem add say di tori say anti-snake venom no dey dia facility no be true.

Who be Ifunanya Nwagene?

Ifunanya Nwagene na 26-year-old fast-rising singer wey come from Enugu State, southeast Nigeria, but base for Abuja bifor her death.

Di young lady wit di stage name Nanyah bin dey sing classical, jazz, RnB, and soul, according to her Instagram account.

She also be architect wey bin graduate from di University of Nigeria, Enugu Campus (Unec).

During her days for Unec, Nanyah bin serve as di choir mistress of St Mulumba's Catholic Chaplaincy, Unec, Enugu, wia she bin lead oda choir members wit her angelic voice.

Four years ago, she bin participate for The Voice Nigeria, wey be singing competition wey dey feature music enthusiasts and professional performers.

Tins you need to do first if snake bite you

Di World Health Organization (WHO) give some advice on wetin to do if snake bite pesin: