ሃንጋሪያዊው የቪዲዮ ጌም ክብረ ወሰንን ለመስበር ለ144 ሰዓታት ጨፈረ

አንድ ሃንጋሪያዊ የሙዚቃ ምት ላይ የተመሠረተውን እና 'ዳንስ ዳንስ ሪቮሊዩሽን' የተሰኘ የሙዚቃ ጨዋታ ለስድስት ቀናት በመጫወት ረዥሙን አዲስ የቪዲዮ ጨዋታ ክብረ ወሰን አስመዝግቧል።

የቡዳፔስት ነዋሪ የሆነው ሳዛቦልስ ሴፔ ከ3000 በላይ በሚሆኑ ዘፈኖች በመጨፈር በክብረ ወሰን መዝገቦች ውስጥ ለመመዝገብ ባደረገው ጥረት ከ22,000 በላይ ካሎሪዎችን አቃጥሏል።

በጌሚንግ ቻናሎቹ 'ግራስሆፐር' በመባል የሚታወቀው የ34 ዓመቱ ሰው ድርጊቱን ለማከናወን ያደረገው ዝግጅት ስድስት ወራት እንደፈጀ እና በ"እግሮቹ እና በመቀመጫው የታችኛው ክፍል" ላይ ያተኮሩ የአካል ብቃት እንቅስቃሴን ማደረጉን ገልጿል።

"'ዳንስ ዳንስ ሪቮሊዩሽን' መጫወት ሁልጊዜ ለእኔ አስደሳች ነው" ሲል ለቢቢሲ ኒውስ ተናግሯል፤ "ስለዚህ ይህ ፈተና አሰልቺ ግን ደስ የሚል እንደሆነ በተሻለ ሁኔታ መግለጽ ይቻላል" ብሏል።

ስኬቱ በዓለም የድንቃ ድንቅ መዝገብ ላይ በይፋ እውቅና አግኝቷል።

የዳንስ ዳንስ ሪቮሊዩሽን ለመጀመሪያ ጊዜ በ1998 ለአርኬዶች የተለቀቀ የጃፓን ተከታታይ የቪዲዮ ጨዋታ ነው።

ተጫዋቾች ነጥቦችን ለማስመዝገብ ከሙዚቃ ቋት በሚከፈቱ ዘፈኖች በዳንስ መድረክ ወይም ምንጣፍ ላይ ቆመው በእግራቸው ባለቀለም ቀስቶችን ይመታሉ።

ጨዋታዎቹም በዩኬ እና በአሜሪካ የትምህርት ቤት የአካል ብቃት እንቅስቃሴ ፕሮግራሞች ውስጥ ተካትተው የአካል ብቃት እንቅስቃሴን ለመጠበቅ ተወዳጅ ሆነዋል።

እአአ በ2004 ጨዋታው በኖርዌይ ውስጥ እንደ ይፋዊ የስፖርት ዝግጅት እውቅና አግኝቷል።

በቅርቡ ጨዋታው በኤሌክትሮኒክ ስፖርት (esports) ማኅበረሰብ ውስጥ ተወዳጅነት እያገኘ መጥቷል፣ በዓለም ዙሪያ ያሉ ተጫዋቾች በተለያየ መንገድ በሚካሄዱ ውድድሮች ላይ ይሳተፋሉ።

ሳዛቦልስ ሴፔ እንዳለው እአአ በ2015 'ጀስት ዳንስ'ን በመጫወት ከ138 ሰዓታት በላይ ያሳለፈችውን የቀድሞ የክብረ ወሰን ባለቤት ካሪ ስዊዴኪን ሙከራ ከተመለከተ በኋላ እሱም ለመሞከር እንደተነሳሳ ተናግሯል።

ነገር ግን በአይቲ ኢንጂነሪንግ የሚሰራው ጎበዝ ተጫዋች ይህንን የዳንስ ስኬት ከመሞከሩ በፊት በርካታ ክብረ ወሰኖችን ሰብሯል።

እአአ በ2021 የናሩቶ ጨዋታን ለረዥም ሰዓት (28 ሰዓት ከ11 ደቂቃ ከ32 ሰከንድ) በመጫወት፤ እንዲሁም ቴትሪስ ኢፌክት የተሰኘን የእንቆቅልሽ ጨዋታ ለ32 ሰዓት ከ32 ደቂቃ በመጫወት ክብረ ወሰኖችን ይዟል።

እአአ በ2023 ግራስሆፐር የሚል ቅጽል ስም የተሰጠው በልጅነቱ ለ20 ዓመታት ያህል የዳንስ ዳንስ አብዮት ሲጫወት እንደነበር ለቢቢሲ ተናግሯል።

ሳዛቦልስ ሴፔ "በጥሩ የእረፍት ጊዜ እረፍት" እንዲወስድ ተፈቅዶለታል። አንድ ሰዓት በመጫወቻ ማሽኑ ላይ ጨፈረ 10 ደቂቃ እረፍት ያገኛል።፣ ይህም ሲጠራቀም በድምሩ ለአንድ ወይም ለሁለት ሰዓት እንዲተኛ ያስችለዋል።

የዓለም ክብረ ወሰን ባለቤቱ አክሎም ሪከርዱ ወደፊት በሌላ ሰው የሚሻሻል ከሆነ የዳንስ ዘውዱን ለመከላከል "በእርግጠኝነት እንደሚመለስ" ተናግሯል።