Elusen yn diolch i 'hogyn caredig' am roi ei bres poced i bobl ddigartref

Ar drothwy'r Nadolig, mae bachgen pump oed o Wynedd wedi cael ei ddisgrifio fel "hogyn eithriadol a charedig", ar ôl iddo gyfrannu ei bres poced er mwyn i blant a phobl ifanc ddigartref gael anrhegion Nadolig.

Roedd Gwion Williams o'r Felinheli wedi dweud wrth ei deulu ei fod eisiau rhoi "pres i Siôn Corn ar gyfer plant bach oedd ddim yn cael llawer o bresanta'".

Gofynnodd ei fam Ceri Williams ar y cyfryngau cymdeithasol am syniadau ar gyfer lle gallai Gwion roi ei arian, ac yna penderfynu ei roi i elusen GISDA sy'n cefnogi pobl ifanc fregus.

Aeth Gwion a'i fam i'r ganolfan yng Nghaernarfon ddydd Mercher i gyflwyno'r arian i'r elusen, sy'n cynnal apêl flynyddol am roddion i unigolion ifanc, a theuluoedd ifanc gyda phlant bach.

Dywedodd Ceri Williams bod yr elusen "wrth eu bodd" gyda rhodd Gwion, a'i fod bob amser yn fachgen sy'n hoffi rhannu a meddwl am bobl eraill, a'n rhoi ei "fferin olaf i ni adre".

"Mae'n deall bod plant bach ddim hefo pethau, ond yn amlwg doedd o ddim yn deall be' oedd GISDA'n neud.

"'Nes i egluro iddo bod plant bach ddim hefo cartref, neu bod Mam a Dad yn sâl, ac odd o'n fodlon i'r pres fynd i fan yna."

Dywedodd Prif Weithredwr GISDA, Siân Elen Tomos eu bod yn dibynnu ar haelioni'r gymuned i allu rhoi anrheg Nadolig i bobl ifanc, a'i bod hi'n "dipyn bach o sioc" bod hogyn 5 oed wedi bod eisiau helpu.

"O'dd ei fam o'n ofnadwy o garedig a chlên, ac o'dd hi'n dda hefo fo - wedi gwrando a rhoi'r cyfle iddo fo a deud, 'mi af i â chdi yna'.

"Odd hi'n neis cael siarad hefo fo am Dolig a Siôn Corn a gofyn be odd o ishio gan Siôn Corn, a jest diolch iddo fo am fod mor ffeind, a deud bod Siôn Corn yn gwylio fo yn bod mor ffeind."

Yn ôl Siân Elen Tomos mae'n anodd gofyn am roddion gan wybod ei bod hi'n gyfnod anodd i lawer o bobl, a'r Nadolig yn gyfnod drud, ond bod pobl leol - yn unigolion, ysgolion a busnesau wedi ymateb yn dda i'r apêl.

Dywedodd eu bod fel elusen yn cefnogi llawer o bobl ifanc, a rhieni ifanc gyda phlant bach a babanod, a'i bod hi'n braf gallu rhoi rhywbeth bach iddyn nhw.

"Mae'n deimlad neis, mae pobl yn licio rhoi," meddai.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.