Dedfryd 40 mis am daro dyn gyda char yn fwriadol ym Methesda

Mae dyn 19 oed wedi cael dedfryd o 40 mis mewn sefydliad i droseddwyr ifanc ar ôl iddo yrru ei gar i mewn i ddyn yn fwriadol ym Methesda fis Awst.

Fe blediodd Thomas Baker yn euog mewn gwrandawiad blaenorol i achosi niwed corfforol difrifol yn fwriadol, gyrru'n beryglus, gyrru pan oedd wedi'i wahardd a gyrru heb yswiriant wedi'r digwyddiad ar 18 Awst.

Clywodd y llys adeg hynny fod Baker, o Lan Ogwen, Bethesda, wedi achosi niwed corfforol difrifol i David Thomas, 37, ac fe blediodd yn euog hefyd i ymosod ar Michael Smith.

Mewn gwrandawiad yn Llys y Goron Caernarfon ddydd Mercher, clywodd y llys bod Baker wedi bod yn rhan o ffrae rhwng pedwar person ar stryd fawr y dref am tua 13:00 ar 18 Awst.

Yn dilyn y digwyddiad hwnnw, clywon nhw iddo ddefnyddio ei Audi A3 "fel arf" gan yrru i mewn i David Thomas.

Dywedodd llefarydd ar ran Heddlu'r Gogledd eu bod yn croesawu'r ddedfryd a'i fod yn ddigwyddiad "echrydus, wnaeth ddigwydd yng nghanol golau dydd".

Cafodd lluniau CCTV eu dangos i'r llys ac roedd hi'n bosib gweld Baker a dyn arall yn cerdded tuag at Mr Smith a Mr Thomas, oedd yn eistedd y tu allan i gaffi.

Gwelwyd Baker yn dyrnu un o'r dynion.

Parhau a wnaeth y ffrae honno, gan arwain at y pedwar dyn yn ymladd ar y stryd.

Roedd y deunydd fideo yn dangos Baker yn dychwelyd i'w Audi, gyda Mr Thomas yn taflu blwch llwch at ei ffenestr flaen, a'i malu.

Yna, cerddodd Mr Thomas a Mr Smith i ffwrdd.

Ychydig wedi hynny, cafodd Audi gwyn Baker ei weld yn gyrru i fyny'r ffordd y tu ôl i'r dynion - aeth ar y palmant tu allan i Gaffi Seren a tharo Mr Thomas o'r tu ôl gan ei daflu i'r awyr.

Dioddefodd Mr Thomas sawl anaf, gan gynnwys toriadau i'w ben ac i'w ffêr - un yr oedd wedi cael llawdriniaeth arni'n ddiweddar.

Dywedodd Heddlu'r Gogledd bod swyddogion wedi dechrau chwilio am Baker yn fuan wedi'r digwyddiad - roedd wedi ffoi o'r lleoliad yn y car.

Cafodd ei arestio ar 19 Awst a'i gyhuddo.

Ni wnaeth Mr Thomas na Mr Smith wneud unrhyw ddatganiadau i'r heddlu.

Clywodd y llys fod gan Baker, sy'n awtistig, bum euogfarn flaenorol gan gynnwys gyrru'n beryglus, ymosod a gyrru tra'i fod wedi'i wahardd.

Dywedodd y Barnwr Nicola Jones wrth Baker ei fod wedi mynd ar y palmant "yn fwriadol a tharo Mr Thomas", gan ychwanegu ei fod wedi defnyddio ei gar fel "arf".

Dywedodd y Ditectif Gwnstabl Gwion Jones fod hwn "yn ddigwyddiad echrydus, wnaeth ddigwydd yng nghanol golau dydd ar stryd fawr brysur wrth i drigolion, twristiaid a phlant fwynhau eu gwyliau haf".

"Fe wnaeth Baker ddangos diystyriaeth ysgytwol tuag at ddiogelwch a lles y dioddefwr a'r cyhoedd ehangach."

Diolchodd y ditectif i bawb wnaeth eu helpu gyda'u hymchwiliad, gan ddweud eu bod wedi llwyddo i arestio'r dyn 19 oed yn gyflym.

Ychwanegodd ei fod yn gobeithio y gallai'r gymuned gael cysur o waith yr heddlu a'i fod yn "croesawu" dyfarniad y barnwr.

"Mae'n anfon neges glir nad oes lle i ymddygiad o'r fath yn ein cymunedau," ychwanegodd.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.