Dyfarniad ar achos Sala CPD Caerdydd yn erbyn Nantes i ddod ym mis Mawrth

Bydd llys yn Ffrainc yn cyflwyno y penderfyniad ar achos Clwb Pêl-droed Caerdydd yn erbyn Nantes mewn cysylltiad â marwolaeth Emiliano Sala ym mis Mawrth.

Clywodd Llys Masnach Nantes ddydd Llun y bydd y penderfyniad ar yr achos rhwng y ddau glwb yn cael ei wneud mewn gwrandawiad ar 30 Mawrth.

Mae Caerdydd yn dadlau eu bod yn haeddu mwy na £100m mewn iawndal yn sgil marwolaeth chwaraewr, y maen nhw'n credu, allai fod wedi cadw'r clwb yn yr Uwch Gynghrair.

Ychydig ddyddiau ynghynt roedd Caerdydd wedi cyhoeddi mai Sala fyddai'r trosglwyddiad mwyaf yn hanes y clwb ar ôl cytuno ar ffi gwerth £15m i'w brynu o Football Club de Nantes.

Mae Caerdydd yn dweud bod y clwb Ffrengig yn atebol am y colledion ariannol y mae'r clwb wedi eu dioddef wedi'r ddamwain, tra bod Nantes wedi gwrthod yr honiadau hynny.

Ym mis Rhagfyr 2018, roedd Mr Sala, ymosodwr Nantes, yn cael ei ystyried gan Gaerdydd fel chwaraewr a allai sgorio goliau i'w helpu yn y frwydr i aros yn Uwch Gynghrair Lloegr.

Ar 19 Ionawr 2019, cyhoeddwyd bod y ddau glwb wedi cytuno ar ffi o £15m am y chwaraewr.

Ddau ddiwrnod yn ddiweddarach, wrth i Emiliano Sala deithio o Nantes i Gaerdydd, bu farw ef a'r peilot David Ibbotson pan blymiodd yr awyren i'r môr ger Guernsey.

Daeth i'r amlwg yn ddiweddarach nad oedd yr hediad wedi'i drwyddedu.

Cafwyd David Henderson – y dyn wnaeth drefnu'r hediad - yn euog o beryglu diogelwch yr awyren ym mis Hydref 2021 a'i ddedfrydu i 18 mis o garchar.

Mae anghydfod wedi bod rhwng Caerdydd a Nantes ers y ddamwain, gyda'r clwb Cymreig yn gwrthod talu'r rhandaliad cyntaf o'r ffi drosglwyddo nes cynnal ymchwiliadau i atebolrwydd.

Arweiniodd y ffrae at FIFA yn gorchymyn i Gaerdydd dalu – gyda'r Adar Gleision yn apelio i CAS (Court of Arbitration for Sport).

Gyda CAS yn cadarnhau penderfyniad FIFA, talodd Caerdydd y rhandaliad cyntaf ym mis Ionawr 2023 – gan ddod â gwaharddiad trosglwyddo cynghrair bêl-droed Lloegr (EFL) i ben – cyn talu gweddill y ffi yn ddiweddarach.

Ond mae'r clwb wastad wedi mynnu eu bod yn barod i gymryd camau pellach, ac ym mis Ebrill 2024 fe wnaethon nhw gyflwyno cwyn i Lys Masnach Nantes gan geisio hawlio 120.2m ewro (£104m) mewn iawndal.

Daw'r ffigwr hwn o golledion ariannol yr honnir i Gaerdydd eu profi o ganlyniad i ddisgyn o'r Uwch Gynghrair yn 2019.

Bydd tîm cyfreithiol Caerdydd yn cyflwyno tystiolaeth gan arbenigwyr gafodd eu cymeradwyo gan y llys, gan gynnwys adroddiad ystadegol gan y cwmni data pêl-droed FC Analytics, sy'n honni y gallai Emiliano Sala fod wedi rhoi hwb o hyd at 62% i obeithion y clwb o aros yn yr Uwch Gynghrair.

O ran y swm, mae'r iawndal yn seiliedig ar ddadansoddiad annibynnol o'r incwm a gollwyd ar ôl disgyn, effaith hirdymor ar werth y clwb, yn ogystal â'r ffi drosglwyddo wreiddiol.

Dydy Nantes heb ymateb i geisiadau am sylw ond mae'r clwb eisoes wedi gwrthod honiadau Caerdydd gan ddweud nad yw eu safbwynt wedi newid.

Mae honiad Caerdydd yn seiliedig ar eu dadl fod y cyn-asiant pêl-droed, Willie McKay yn gweithio ar ran Nantes pan gafodd yr hediad ei threfnu gyda Mr Henderson.

Roedd Mr Sala wedi cael cynnig hediad masnachol gan glwb Caerdydd i ddychwelyd i Gymru ond roedd am gael mwy o amser i ffarwelio yn Nantes.

Nid oedd Mr McKay yn asiant cofrestredig ac mae wedi honni o'r blaen mai helpu ei fab Mark – yr asiant drefnodd y trosglwyddiad - oedd o, ond fe drefnodd yr hediad.

Mae Nantes eisoes wedi gwadu fod Willie McKay yn gweithio ar eu rhan.

Cymerodd Caerdydd gamau sifil yn erbyn Willie McKay i gael datgelu e-byst a dogfennau yn ymwneud â'r trosglwyddiad, gyda chytundeb y tu allan i'r llys yn cael ei wneud ym mis Chwefror 2024.

Dywedon nhw fod y negeseuon hyn yn profi'r cysylltiad ac felly atebolrwydd terfynol Nantes am yr hediad a'r effaith ariannol a ddilynodd pan gollodd Caerdydd eu lle yn yr Uwch Gynghrair.

Roedd penderfyniad FIFA i orchymyn Caerdydd i dalu'r ffi drosglwyddo yn seiliedig ar y ffaith fod y cytundeb wedi'i gwblhau'n swyddogol ac felly roedd y taliad yn ddyledus.

Cytunodd CAS nad oedd modd ystyried agweddau eraill, fel atebolrwydd am yr hediad neu iawndal posibl. Cytunodd y Llys Ffederal yn y Swistir nad oedd gan CAS yr awdurdod i ymdrin â'r materion hynny.

Mae Caerdydd yn credu mai dyma'r tro cyntaf i farnwr wrando ar eu cwynion am y trosglwyddiad, gan ddweud nad yw llawer o'r hyn gafodd ei drafod yn y gwrandawiad hwn erioed wedi cael ei archwilio'n llawn o'r blaen.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.