Dìth seirbheis fiaclaireachd "am measg na tha a' cur ri crìonadh-sluaigh"

Tha cuid ann an Geàrrloch air Taobh Siar Rois le dragh mun bhuaidh air seasmhachd na coimhearsnachd agus iad air a bhith às aonais fiaclair ionadail airson cha mhòr dà bhliadhna.

Tha NHS na Gàidhealtachd ag ràdh gu bheil e fìor dhoirbh fiaclairean NHS fhastadh agus a chumail an sgìrean dùthchail, agus nach eil duine air ùidh a nochdadh san ionad ann an Geàrrloch.

Tha muinntir na sgìre far an dòigh leis an t-suidheachadh leis gu bheil aca ri dhol astar math - a dh'Inbhir Pheofharain, Alanais neo Ulapul - airson cùraim.

Feumaidh cuid de phàrantan làithean dheth far an cuid obrach airson clann a thoirt dhan fhiaclair.

Dhùin an aon ionad fiaclaireachd ann an Geàrrloch san Fhaoilleach 2024.

Ron sin, bha an sluagh air gabhail ri crathadh san t-seirbheis ann an 2017 nuair a chaidh inbhich a bha clàraichte gu planaichean prìobhaideach le clann a-mhàin air clàr an NHS.

Bha am fiaclair a bh' ann aig an àm air innse nach b' fhiach an t-ionad a chumail fosgailte fo mhodail mhaoineachaidh an NHS.

Lean am modail measgaichte seo nuair a cheannaich buidheann corporra fiaclaireachd an t-ionad an 2022.

Ge-tà, tha trioblaidean fastaidh a-nis a' fàgail na coimhearsnachd gun seirbheis fiaclaireachd faisg orra.

Tha Cathraiche Comhairle Coimhearsnachd Loch Iùbh an Iar, Ross MacIllEathain, den bheachd gu bheil an suidheachadh am measg na tha ag adhbharachadh crìonadh-sluaigh air an tuath.

Thuirt e: "Faodaidh sinn bruidhinn air taigheadas, sgoiltean, cosnaidhean agus Slighe NC500 ach ma chailleas sinn seirbheisean mar seo 's e adhbhar eile gun gluasad chun na sgìre neo fuireach ann."

Tha e ag iarraidh air Riaghaltas na h-Alba agus NHS na Gàidhealtachd na riaghailtean atharrachadh a thaobh mar a tha an t-seirbheis ga maoineachdh.

"An rud a tha ag obair ann an Inbhir Nis agus an Dùn Èideann, chan obraich e ann am Poll Iù agus Geàrrloch," thuirt e.

Tha NHS na Gàidhealtachd ag ràdh gu bheil iad ag obair "còmhla ri bùird slàinte eile agus Riaghaltas na h-Alba airson 's gum bi seirbheisean fiaclaireachd NHS seasmhach an sgìrean dùthchail."

Thuirt iad: "Tha NHS na Gaidhealtachd ag aithneachdh nan draghan ann an Geàrrloch agus tha sinn a' cumail sùil air an àireamh dhaoine a tha a' feuchainn ri iad fhèin a chlàradh air liosta an NHS san sgìre.

"Aig an ìre seo, chan eil planaichean sam bith ann ionad fiaclaireachd fhosgladh às ùr ann an Geàrrloch."